Verður maður ekki að blogga í dag?

I save - you save - we all save for Icesave kom upp í huga minn einhverntíma. Þetta er vitaskuld afbökun af I scream - you scream - we all scream for icecream.

Í dag eru kosningar um allt land og í hverju koti. Og veðrið undirstrikar leiðindin sem þessu tengjast. Brjálað veður. Maður á að merkja við já eða nei. Önnur niðurstaðan þýðir skv. því sem ég fæ best séð að við séum hengd en hin að við séum skotin. Bergur Ebbi lýsir þessu vel.

Það versta er að ef ég segi já þá finnst mér ég vera að standa með þeim sem öðru frekar voru valdar eða beinir aðilar að bankahrunssukkinu. Og þá mislíkar mér hvernig Vilhjálmur Egilsson hefur í hótunum við þjóðina. Þannig að hérna megin línunnar er fjöldi manna sem mér er illa við að samsama  mig við.

Ekki skánar það handan línunnar því þar eru allskonar sjónarmið sem mér er illa við. Þar fara verst í mig þau sjónarmið sem mér finnast liggja nærri þjóðrembu, einangrunarhyggju og afskaplega ómálefnalegum málflutningi. Svo ekki sé talað um það hugarfar að ekkert skapi hér verðmæti nema sjávarútvegur, að allir opinberir starfsmenn séu afætur, að bókvit verði ekki reitt í þverpokum, að enginn sé maður nema mígi í saltan sjó (og væntanlegar með hendur í köldu vatni á sama tíma).

Það allra versta er hvernig allir aðilar beita hótunum og hræðsluáróðri. Ekki bara í þessu máli.
Evrópuandstæðingar halda því fram að með aðild tapist fullveldi, sjálfsákvörðunarréttur, auðlindir og þjóðerni líka. Skyldu Spánverjar, Bretar, Frakkar og allir hinir vita þetta?
Í Mogga í gær var maður að halda því fram að aðalmál finnsku kosninganna 17/4 myndu snúast um afnám Evru og úrsögn úr EB. Hverjir knýja það áfram? Sannir Finnar sem eru nánast þjóðernissinnar með 4% fylgi..
.
Þegar hér var gengið til atkvæða um stærra álver átti Hafnarfjörður að leggjast af og álverið að loka.
Þegar Kárahnjúka/álversumræðan stóð sem hæst var hætta á að Austurland leggðist í auðn ef...

Mér mislíkar hótandi málflutningur því hann stendur lýðræði og málefnalegri umræðu fyrir þrifum. Mér mislíkar þegar fólk sem verður undir í atkvæðagreiðslu neitar að virða hana (kallað Liljuatlasyndrómið hér með). Og mér mislíkar sú trú manna að Ísland sé eitthvað spes. Nema menn eigi við það að ekki sé hægt að fara eftir reglum, láta sömu lögmál gilda hér og annars staðar og ekki síst að halda það að loftslagskvóti sé veiðikvóti sem fullnýta þarf.
Ég er Evrópusinni og þetta er hún flotta frænka mín sem gott er að hlusta á (heitir raunar Sigrún Ingibjörg) og þetta sýnir að Bergur Ebbi er ekki bara djókari. Það er von í ungu velmenntuðu fólki!