Innritunarvandi framhaldsskólanna - hættunni aflýst?

Hér má lesa fréttatilkynningu um innritun 10. bekkinga.


Þar segir m.a. ,,Búið er að tryggja öllum þessum nýnemum skólavist í 31 framhaldsskóla...Betur gekk nú að útvega nýnemum skólavist í framhaldsskólum en áður. Rúmlega 98% umsækjenda fengu inni í öðrum þeirra skóla er þeir sóttu um en tæplega 97% í fyrra. Mestu munar að þar af fengu nú tæp 87% nýnema inni í skóla er þeir völdu númer eitt en hlutfall þeirra í fyrra var mun lægra eða rúm 82%...Þá var framhaldsskólum áfram gert að líta sérstaklega til með nemendum í grunnskólum í þeirra nágrenni og veita umsækjendum þaðan forgang að skólavist í að lágmarki 40% lausra nýnemaplássa. Þetta hlutfall var 45% árið 2010... Breytingar á fyrirkomulagi innritunar nýnema hafa að leiðarljósi að tryggja rétt nýnema til skólavistar í framhaldsskólum í anda laga um grunn- og framhaldsskóla frá 2008. Markmiðið er að auðvelda nemendum að flytjast úr grunnskólum í framhaldsskóla og finna þar nám við hæfi..."

Lítur vel út og DV segir frá þessu hér með mynd af góðum skóla! En Mogginn fjallar um þetta út frá MH og VÍ.

Svo eins og segir einhvers staðar - Life is good.

Þá koma fýlupúkar eins  og ég.

Það má vera að ráðuneytisfólki hafi fundist þessi innritun ganga vel en ég leyfi mér að halda því fram að enn er langt í land.

Fyrir það fyrsta. Kerfinu er ekki fylgt til enda. Fyrst er forinnritun - svo alvöru (í raun bara staðfestingarferli). Þá vinna skólar úr listum sínum og raða eftir reglum sínum og síðan tekur SKÝRR við og vinnur úr öllu. Þá hafa skólar gefið upp viðmiðunartölur um fjölda og tölvan hjá SKÝRR raðar nemendum inn eftir annars vegar fjölda sem upp er gefinn og hins vegar raðtölum sem skólar gefa (þessi nemandi er nr. eitt og svo framvegis). Þegar öllu þessu var lokið stóðu um 5% nemenda út af borðinu. Þetta voru sem sé þeir sem hvergi komust að af hvaða sökum sem það var. Sumir voru með ágætar einkunnir en aðrir þurfa mikla hjálp.
Þegar hér var komið við sögu höfðu tilteknir skólar handvalið nemendahóp sem gerir þeim kleift að vera með lágmarksþjónustu og því hóp sem getur að mörgu leiti gengið sjálfala. Þarf ekki að láta kennslu þvælast fyrir sér. Þeir nota rök eins og að ,,uppfylla skilyrði." Aðrir skólar höfðu tekið inn megnið af mismuninum, oft afbragðsnemendur en mikla breidd í námsgetu. Þeir fara nefnilega eftir 32. gr. laga nr. 92/2008 um skyldu til að sinna nemendum yngri en 18 ára. Þegar nemandi komst t.d. ekki inn í Flensborg (eða FG eða MK eða IH eða aðra skóla) á grunni fyrsta vals fór hann í skóla 2 eða datt út af borðinu. Þannig misstu skólarnir af ágætis nemendum á grundvelli fjárheimilda sem fyrir lágu. Stór hópur sem sótti um Flensborg t.d. fór á seinni valkostinn.
Hins vegar gerðist það á lokasprettinum að afgangnum var troðið á einstaka skóla og þá nemendum sem neðar stóðu en nemendum sem vísað hafði verið frá. Þeir fengu sem sé meiri rétt en þeir sem ofar stóðu. Og fyrir þetta þarf skólinn að svara. Þannig að fyrst er búið til kerfi en svo þegar allt kemur til alls er því hent og öllum ráðum beitt til að leysa vanda afgangsins.

Annað er að á sama tíma njóta valdir skólar verndar og sitja hjá. Verndaðir gegn nemendum sem ekki uppfylla skilyrði, þurfa ekki að bjóða starfsbrautir, vera með almenna námsbraut eða nemendur með aðlagaða námskrá o.s.frv. Þessi vinnustaðavernd sem þarna viðgengst er óþolandi og óréttlát gagnvart stofnunum, starfsmönnum og nemendum. Þarna hafa engar framfarir að gagni orðið.

Mér finnst forinnritunarkerfið skila glettilega litlu því sá vandi sem að ofan er lýst lá fyrir í apríl en var óleystur 22. júní - 13 dögum eftir að innritun lauk. Ég leyfi mér að halda því fram að það hefði mátt ljúka innritun í apríl. Skv. túlkunum stjórnvalda á 32. gr. laga nr. 92/2008 þarf ekki grunnskólaeinkunnir nema til flokkunar eftir ferðum.

40/45% reglan er ónýt með öllu. Meira að segja MH sem þó var hælt fyrir að vera með 35% reglu áður en 45% reglan var innleidd tekur einvörðungu 23% úr forgangsskólum, Versló rétt nær 20%, MR um fjórðungi og Kvennó nær þó 40% (NB var lækkað úr 45% frá í fyrra).

Sem sé - til hvers eru vinnureglur sem gilda bara um suma?

Til lukku með að innritun gekk vel en kerfið er alveg jafn ónýtt og óréttlátt og það var og hefur verið. Á meðan aðilar eins og Heimili og skóli standa vörð um verndaða skóla, Mennta- og menningarmálaráðuneytið lætur líta út fyrir að allt sé í lagi þegar það er það ekki (sjá fréttatilkynningu) og meðan menn eru með kerfi sem er kerfislega sniðgengið þá er langt í Nýja Ísland. En það á sosum við víðar en í skólamálum.