Er þeim þakkaður stuðningurinn.
Í ræðu fulltrúa útskriftarnema, Benedikts Arnar
Þorvaldssonar, kom m.a. fram að hópurinn hefði gefið peningagjöf til
Barnaspítala Hringsins.
Tveir skiptinemar voru kvaddir en það voru þau Agathe
Ismene Baudoin frá Frakklandi og Giacomo Gobbato frá Ítalíu. Tveir nýnemar
fengu verðlaun fyrir frábæran árangur en það eru þeir Ólafur Andri og Þór Breki
Davíðssynir. Þeir eru raunar tvíburar.
Tveir starfsmenn, sem láta af störfum
sakir aldurs voru einnig kvaddir þeir Sveinn Þórðarson og Jóhann Guðjónsson,
Sveinn eftir liðlega aldarfjórðungs starf og Jóhann eftir 42 ára starf.
Loks voru starfsmenn heiðraðir. Sveinn
Þórðarson, fékk gullmerki fyrir 25 ára störf í þágu skólans. Þá fengu þessir
silfurmerki fyrir 10 ára starf:Friðrik Olgeir Júlíusson, Pálfríður Bjarnadóttir,
Ása Katrín Hjartardóttir, Ásta K. Pálmadótti, Díana Guðjónsdóttir, Eygló
Jónsdóttir, Guðrún Hafdís Eiríksdóttir, Hólmfríður Sigþórsdóttir, Hrafnkell
Tumi Kolbeinsson, Hrefna Steinarsdóttir og Svana Björk Karlsdóttir.
Guðrún Hafdís
Eiríksdóttir, kennari í stærðfræði, samdi kennsluefni fyrir nýja stærðfræðikeðju,
sem heitir Hagnýt stærðfræði. Þetta eru þrír áfangar og bók fyrir hvern. Með
gjafabréfi hefur hún fært skólanum eignar- og útgáfurétt á þessum bókum.
Kór Flensborgarskólans og
Flensborgarkórinn sungu undir stjórn Hrafnhildar Blomsterberg.
Einn nemandi hafði
þegar verið útskrifaður en það er Joniada Dega frá Albaníu sem nokkuð hefur
verið til umfjöllunar í fréttamiðlum. Joniada útskrifaðist með glæsibrag en þó var svolítið snúið að
yfirfæra albönsku námskrána yfir á okkar. Athöfnin var tilfinningaþrungin en
ánægjuleg. Þar voru kennarar hennar og samnemendur margir. Joniada flutti ræðu
á íslensku og sagði hún m.a.
En vitið þið
hvað? Að læra með þeim bestu og af þeim bestu hefur verið lykillinn að
velgengni minni.... [Þ]að mikilvægasta sem ég hef lært í skólanum er að treysta
á aðra sem og styðja aðra sem þurfa á því að halda.
Skólameistari sagði m.a.: Ég hef oft kvartað undan því í ræðu og riti að samfélag okkar
skilgreini ekki nægjanlega inntak og tilgang skólastarfs. Við ræðum ekki hver
stefnan eigi að vera eða um hvað skólastarf eigi að snúast?
Skólinn er ekki kostnaður. Við eigum að sjá
skólann sem skapandi afl. Samfélagslega bætandi afl. Rannsóknir segja að við
séum að búa nemendum okkar betri lífskjör, gera þau að betri borgurum, - glæða
sálargáfur þeirra.
Enn frekari
upplýsingar má fá á vef skólameistara (http://maggibloggari.blogspot.com).
Úr ræðu skólameistara:
Kæru útskriftarnemendur, formaður
skólanefndar, samstarfsmenn og góðir gestir.
Þegar Flensborgarskólinn tók til
starfa árið 1882 þá var honum ætlað að sinna m.a. þeim alþýðubörnum í
Garðahreppi sem ekki áttu kost á skólagöngu annars. Þau voru framsýn hjón frú
Þórunn Jónsdóttir og sr. Þórarinn Böðvarsson. Jón sonur þeirra sem varð
skólastjóri fékk að auki allskonar hugmyndir sem þá þóttu gagnrýniverðar, s.s.
að það kynni að vera rétt að mennta kennara. Á áttunda áratug síðustu aldar
gekk þáverandi skólameistari, Kristján Bersi Ólafsson í lið með skólamönnum sem
nýttu sér ný lög um menntaskóla og mótuðu fjölbrautaskólakerfið. Þá fóru um 30%
ungmenna áfram til mennta að lokinni skólaskyldu en í dag eru það nær öll
ungmenni.
Þau 70% sem bættust við fóru ásamt
hluta hinna inn í fjölbrautakerfið og þykir í dag sjálfsagt. Áður var sá möguleiki einfaldlega ekki til staðar.
Um 1970 sáu margir það sem ógn ef
sú skólasókn færi yfir 40% og töluðu um ofmenntun. Í dag er skóli eins og
Flensborg enn að sinna því verki sem hann var stofnaður til að vinna. Að opna
fólki leið til mennta. Staðreyndin er sú að skóli eins og þessi rúmar mikla
fjölbreytni og hér leiðum við til útskriftar nemendur, sem fyrir daga
fjölbrautabyltinganna hefðu ekki fengið að fara í framhaldsskóla. Við vitum af
mörgum sem eru komnir langar leiðir í framhaldsnámi, búnir með miklar
háskólagráður vegna þeirra tækifæra sem þeir fengu hér. Við heyrum af nemendum
okkar um allan heim, allt frá háskólaprófessorum til íþróttamanna. Kannski
óheppileg pörun. Ef við horfum eingöngu til íþróttamanna erlendis þá mætti
nefna Tönju Ólafsdóttiu og Unni Ösp Alfreðsdóttur sem urðu Norðurlanda-meistarar
unglinga 2016 í hópfimleikum. Sara Björk Gunnarsdóttir knattspyrnukona var að
semja við Wolfsburg í Þýskalandi sem er Barcelona kvennaboltans
Sigríður Hrönn Bergþórsdóttir
fimleikakona komst í úrslit á heimsbikarmóti í fimleikum og í verðlaunasæti á
NM nú um síðustu helgi auk þess sem hún var hluti af hópi sem vann til
gullverðlauna. Núna um helgina keppir hún á EM í áhaldaleikfimi. Kvennalandsliðið í knattspyrnu var að miklu leyti skipað
Flensborgarkonum um hríð. Aron
Pálmarsson er að spila til úrslita í Meistaradeild Evrópu, Ólafur Andrés
Guðmundsson sænskur meistari. Það eru margir sem má nefna en hæst í þessum hópi
trónir sundkonan Hrafnhildur Lúthersdóttir. Þarf eitthvað að ræða það?
Af listamönnum má nefna Kristján
Marteinsson, sem á aðild að hverju snilldarverkinu á fætur öðru, söngkonan
Sóley, þær stöllur í Ylju og svo sækja fram efnis listamenn til viðbótar t.d. í
Músíktilraunum. Einn verð ég að nefna en það er hann Hafsteinn Þráinsson sem
spilar með fjölda hljómsveita og með honum eru fleiri krakkar héðan. Arnar Dan
Kristjánsson fer hamförum í Mamma Mia og þannig má lengi telja. Ég geri mér
grein fyrir að þetta er slembivalið úrtak og bið þá forláts sem ekki voru
nefndir.
Svo eru afreksmenn í námi, eins og
ég vík að hér á eftir.
Okkar fólk fer víða um lönd. Ég
hef fengið óvanalega margar beiðnir um meðmæli eða umsagnir frá nemendum sem
stefna á nám erlendis. Þá er gott að muna það sem segir í Hávamálum: Vits er
þörf þeim er víða ratar.
Þessi orð Hávamála eru viðeigandi
í dag því nokkur hluti þess hóps sem hér situr hyggur á ferðalög, flutninga
innan lands og utan.
Í vetur höfum við mörg hver verið
upptekin af fólki sem flyst milli landa. Það eru í senn þeir sem héðan eru að
fara, sem og þeir sem hingað leita. Þar er sárast að horfa á eftir ungu fólki
sem telur aðstæður þannig að það vill fremur fara en vera hér á landi. Þetta er
ekki síst skrýtið vegna þess að við búum í stóru og strjálbýlu landi. Þó hluti
þess sé illa byggilegur þá eru þó vel byggilegar sveitir hálftómar og
þéttbýliskjarnar sem mega muna sinn fífil fegurri. Kannski þurfum við að fara
að gera upp við okkur hvort við viljum halda fólkinu okkar hér við góð kjör eða
hvort við teljum þörf á að fylla í skörðin með öflugu fólki frá öðrum löndum
nær og fjær. Nema hvort tveggja verði gert. Í raun má segja að landið okkar
hafi burði til að að fóstra íbúa sína í vellíðan. Við ættum að geta lifað saman
í sátt og við ættum að geta tekið við gestum frá öðrum löndum.
Og vits er þörf þeim er víða
ratar, því vissulega vonum við að hver vegur að heiman sé vegurinn heim, að ferðalangurinn
snúi heim með þekkingu sína og reynslu og miðli til okkar. Þá getur gerst að
þeir, sem frumkvöðlar, verði skotspónar athugasemda af öllum toga. Þannig þótti
hugmynd Jules Verne um ferðir til tunglsins heldur ósennileg, svo ekki sé talað
um landrekskenningu Wegeners og gert var grín að Einari Benediktssyni skáldi
fyrir að ætla að selja ferðamönnum norðurljósin. Sá hlær best sem síðast hlær!
Það er harla margt sem breyst
hefur í skólastarfinu. Ég hygg að margir þeirra sem eru komnir t.d. á
sextugsaldurinn myndu varla þekkja sig í nútíma kennslustofu. En það merkilega
er samt að umgjörð skólastarfs er föst og því virðist minna breytast en raun er
á. Þegar litið er á námsgreinar Flensborgarskólans fyrir 100 árum og í dag þá
eru nöfnin þau sömu þó svo efnistökin séu gjörólík. Kennarar skólans semja
heilmikið námsefni og hafa alltaf gert, hvort heldur er sem kennslubækur eða
kennslugögn. Mér er heiður að segja frá því að skólinn fékk nú í vor afar
rausnarlega gjöf. Guðrún Hafdís Eiríksdóttir, kennari í stærðfræði og frábær
kennari, samdi kennsluefni fyrir nýja stærðfræðikeðju, sem heitir Hagnýt
stærðfræði. Þetta eru þrír áfangar og bók fyrir hvern. Með gjafabréfi hefur hún
fært skólanum eignar- og útgáfurétt á þessum bókum. Þetta er sérlega rausnarleg
gjöf og orð fá ekki lýst þakklæti mínu til Guðrúnar. Í dag er meiri krafa um
skapandi lausnir og fjölbreyttari kennsluhætti. Hvort um sig kallar á það að
nemendur og kennarar geti fengið rými til að vinna, nemendur á skapandi hátt og
kennarar með fjölbreytni, sem er einnig skapandi vinnulag. Til að ná því þarf
einbeitingu. Næði og traust í kennslustofum. Næði og traust við námið. Mjög
skapandi listamaður var spurður hvort þetta væri ekki magnaður eiginleiki.
Svarið var: þetta er ekki eiginleiki. Ég þarf að fá tíma og næði og ráðrúm til
að gera mistök. Ef ég gerði aldrei mistök, myndi ég aldrei gera neitt af viti.
II
Aðeins að öðru.
Það eru nokkrar tilfærslur í hópi
starfsmanna.
Anna Katrín Ragnarsdóttir mun
leysa Sunnu Þórarinsdóttur af í barnsburðarleyfi Sunnu.
Álfheiður Eva Óladóttir tekur við
starfi mannauðsstjóra af Erlu Ragnarsdóttur, sem leysti raunar Bryndísi Jónu
Jónsdóttur af. Bryndís kemur aftur en í hálft starf, m.a. við kennslu.
Árni Sverrir Bjarnason og Sigrún
Pálína Magnúsdóttir fara í launalaust leyfi.
Dagrún Ólafsdóttir kemur úr
launuðu orlofi.
Eygló Jónsdóttir kemur aftur eftir
veikindi.
Guðrún Jóna Sigurðardóttir hverfur
til annarra starfa og við þökkum henni fyrir góð störf. Sama gildir um Védísi
Gunnarsdóttur sem vann í mötuneytinu.
Hildur Einarsdóttir fer í launað
orlof.
Hrefna Geirsdóttir lætur af störfum
sem aðstoðarskólameistari og hverfur til annarra starfa.
Svava Margrét Sigurðardóttir
leysti Sigrúnu Eddu Knútsdóttur af meðan Sigrún var í launalausu leyfi. Við
fögnum því að Sigrún er komin aftur og við þökkum Svövu Margréti vel unnin
störf og góð viðkynni.
Þeir Heimir Björnsson og Hrafnkell
Tumi Kolbeinsson fóru báðir í feðraorlof í vetur. Í þeirra skörð hlupu þeir
Úlfur Einarsson og Jakob Ævarsson. Við ætlum að halda þeim áfram ef hægt er.
Elín Guðmundardóttir kom til starfa í haust við Bæjarbrúnna og verður áfram.
John O‘Neil leysti Eygló Jónsdóttur af og verður eitthvað áfram. Kristín Arna
Hauksdóttir kom til kennslu í íslensku og verður áfram.
Ég held ég sé kominn með það sem
liggur fyrir.
Rétt er að þakka NFF,
nemendafélaginu og forystu þess fyrir þeirra framlag i vetur. Þar eru orðin
oddvitaskipti og að venju erum við full tilhlökkunar að takast á um
skólastarfið og félagslífið og það hvaða vægi hvort um sig á að hafa.
Það hefur verið
margt sem við höfum unnið að í vetur. Sumt er skemmtilegra en annað. Ég ætla
ekki að ræða hér fjármál að neinu marki. Vinna við nýja námskrá heldur áfram
enda eru margar hugmyndir í umræðunni sem þarf að fella að okkar vinnu. Miklar
breytingar í vetur, í starfsumhverfi, kjarasamningum og námskrá hafa tekið
toll. Næsta skólaár verður notað til að ná jafnvægi enda er mikil vinna fram
undan við yfirfærslu námskrár úr gömlu kerfi í nýtt. Núna erum við með liðlega
30 námsbrautaafbrigði ný og gömul. Ég ætla ekki að slá tölu á öll áfangaheitin
sem eru ný. Það er óheyrilega mikið sem hefur verið gert og nú er að leita
jafnvægis og veitir ekki af. Hér hafa kennarar svarað kröfum námskrár af elju
og fagmennsku.
Ég hef oft
kvartað undan því í ræðu og riti að samfélag okkar skilgreini ekki nægjanlega inntak
og tilgang skólastarfs. Við ræðum ekki hver stefnan eigi að vera eða um hvað
skólastarf eigi að snúast?
Skólinn er ekki kostnaður. Við eigum að
sjá skólann sem skapandi afl. Samfélagslega bætandi afl. Rannsóknir segja að
við séum að búa nemendum okkar betri lífskjör, gera þau að betri borgurum, -
glæða sálargáfur þeirra.
Einn þáttur þess að glæða sálargáfur er
að temja fólki góða siði í notkun samfélagsmiðla. Þetta þykir oft vettvangur grimmdar
og stundum er þar vegið úr launsátri. Mér finnst óhugnanlegt hvernig samskipti geta
farið þar fram. Samskipti og siðferði athugasemdakerfanna mættu taka mið af því
sem fyrrnefndur norðurljósasali, Einar Benediktsson orðaði í ljóði þar sem hann
ritaði m.a.
Eitt bros getur dimmu í dagsljós
breytt,
sem dropi breytir veig heillar skálar.
Þel getur snúist við atorð eitt.
Aðgát skal höfð í nærveru sálar.
Svo oft leyndist strengur í brjósti sem brast
við biturt andsvar, gefið án saka.
Hve iðrar margt líf eitt augnakast,
sem aldrei verður tekið til baka.
sem dropi breytir veig heillar skálar.
Þel getur snúist við atorð eitt.
Aðgát skal höfð í nærveru sálar.
Svo oft leyndist strengur í brjósti sem brast
við biturt andsvar, gefið án saka.
Hve iðrar margt líf eitt augnakast,
sem aldrei verður tekið til baka.
Eitt bros getur dimmu í dagsljós
breytt. Göngum út í sumarið með þessa hugsun.
Takk fyrir
III
Nemendatölur
Alls voru 774
nemendur í skólanum á haustönn en um 630 hófu nám á vorönn. Fleiri stunda nám á
nýju og gömlu félagsfræðibrautinni en á raungreina- og náttúrufræðibraut. Rétt
rúmur helmingur nemenda er drengir og um 150 nemendur á íþróttaafrekssviði. Þar
auki var hópur grunnskólanemenda í 9. og 10. bekk í Bæjarbrúnni sem er
samstarfsverkefni við Hafnarfjarðarbæ. Nokkur og ört vaxandi hópur er á nýstofnuðu
listasviði. Um fjórðungur nemenda stundar nám samkvæmt nýrri námskrá en
flækjustig þess að vera með tvö kerfi með sitthvorri einingatalninguni leiðir
til þess að við erum farin að íhuga hvort við getum sameinað nemendur undir
nýju kerfi á næsta skólaári.
Útskriftarhópurinn 74 nemendur.
Félagsfræðabraut 24 28
Félagsfræðabraut, íþróttaafrekssvið 4
Málabraut 2
Náttúrufræðabraut 15 22
Náttúrufræðabraut_íþróttaafrekssvið 7
Opin námsbraut 1
Starfsbraut 1 og 2 5
Viðbótarnám til stúdentsprófs 2
Viðskipta- og hagfræðabraut 11 14
Viðskipta- og hagfræðabraut_íþróttaafrekssvið 3
Það eru 25
nemandur sem eru með 8,0 eða hærra í meðaleinkunn. Það eru sex með níu eða
hærra í meðaleinkunn.
Þetta eru
Vildís Hekla
Gísladóttir 9,1
Ragnar Már
Jónsson 9,13
Þóra Kristín
Jónsdóttir 9,21
Ólafur Tryggvi
Magnússon 9,3
Þá eru tvær konur
eftir og ég ætla að útskýra eitt áður en við komum að því.
Innan sem er það
kerfi sem heldur utan um öll náttúrulögmál einkunnagjafar reiknar aðaleinkunn
með tveimur aukastöfum. Samkvæmt því er
Sigurlaug Rún
Jónsdóttir 9,63
Guðlaug Agnes
Kristjánsdóttir 9,65
Þær teljast því
báðar dúxar þessari önn.
IV
Afhending
prófskírteina
Einn nemandi
hefur þegar verið útskrifaður en það er Joniada Dega frá Albaníu sem nokkuð
hefur verið til umfjöllunar í fréttamiðlum. Joniada útskrifaðist með glæsibrag en þó var svolítið snúið að
yfirfæra albönsku námskrána yfir á okkar. Athöfnin var tilfinningaþrungin en
ánægjuleg. Þar voru kennarar hennar og samnemendur margir. Joniada flutti ræðu
á íslensku og sagði hún m.a.
En vitið þið
hvað? Að læra með þeim bestu og af þeim bestu hefur verið lykillinn að
velgengni minni.... [Þ]að mikilvægasta sem ég hef lært í skólanum er að treysta
á aðra sem og styðja aðra sem þurfa á því að halda.
Kveðja
Tveir heiðursmenn sem hætta vegna
aldurs.
Sveinn Þórðarson hefur starfað við
skólann frá haustinu 1990. Hann hefur kennt sögu og íslensku og var einn af
frumkvöðlunum sem fóru að setja upp heimasíður með kennslugögnum sem ég veit að
hafa verið notaðar víða umland og víða um heim. Sveinn hefur einnig verið
afkastamikill í útgáfu sagnfræðirita og hefur gefið út nokkrar sérlega vandaðar
bækur. Hann þykir hafsjór af fróðleik, sérlega vandaður penni og
prófarkalesari. Svo er hann í ákaflega góðu og öfundsverðu formi og ef ég man
rétt þá er hann bifvélavirki líka.
Það hafa verið forréttindi að kenna með
Sveini og oftar en ekki hef ég fengið frá honum góðar ábendingar. Sveinn viltu
koma hér upp?
Jóhann Guðjónsson hóf störf við skólann
1974 sjálft þjóðhátíðarárið, - og það segir til um aldur ef maður man eftir
því. Jóhann hefur gegnt starfi kennara, áfangastjóra og aðstoðarskólameistara.
Ég kom hér til starfa fyrst árið 1981 – veit að það er ótrúlegt miðað við
útlitið – og hreyfst af hugmyndum Jóhanns um kennsluhætti. Þá hafði hann leikið
stórt hlutverk í skólabyltingunni sem hér átti sér stað á áttunda áratugnum. Ég
veit ekki hvort nokkur gerir sér grein fyrir því framlagi til samfélagsins sem
liggur í liðlega fjórum áratugum í kennslu? Fyrir utan kennsluna hér þá var
Jóhann mikilvægur við mótun kennsluhátta í líffræði sem námsgreinar.
Mér finnst það hafa verið forréttindi
að hafa kynnst Jóhanni þegar ég byrjaði að kenna hér í Flensborg.
IX
Það er mér mikilvægt að fá að þakka samstarfsfólki mínu öllu.
Sérstaklega vil ég þó þakka þeim vaska hópi sem kemur að undirbúningi
útskriftarinnar, og ætla ekki að telja þau öll upp.
En það er einn hlutur eftir. Ég hef verið skólameistari hér
veturinn 2009-10 og frá 2013. Öll þessi ár hef ég haft við hlið mér góðan
samstarfsmann sem hefur reynst mér traustur. Það er hún Hrefna Geirsdóttir.
Hvað gera karlar sem hafa ekki konur sér við hlið? Ekki veit ég það því Hrefna
hefur verið mér til trausts og halds hér í vinnunni.
Hrefna er ekki að hætta en ég vildi samt fá að færa henni smá
blómvönd í þakklætisskyni fyrir að hafa verið aðstoðarskólameistari minn og
raunar um hríð í vetur skólameistari í forföllum mínum.
X
Kæru útskriftarnemendur. Nú er komið þar í sögunni að ég þarf að
botna mál mitt vel og vandlega.
Þið eruð nú orðin hluti af þeim hópi sem lokið hefur námi við
Flensborg. Sú saga nær aftur um 130 ár. Þegar fram líða stundir munu einhver
ykkar snúa aftur og vilja fara að kenna hjá okkur. Eða annars staðar. Sjáum
til.
Núna þegar þið kveðjið og farið að leita að því sem gerist eftir útskrift
í Flensborg þá má líkja því við daginn þegar þið komuð hér fyrst og fóruð um
gangana leitandi að réttu hurðinni. Nú lokast okkar dyr að vissu leyti en það
taka við nýir rangalar, nýjar dyr.
Þá skiptir máli að velja. Velja rétt? Ég veit ekki hvort það er
alltaf hægt. Stundum eru margir jafngildir valkostir og þegar á hólminn er
komið þá verður maður að spila úr þvi sem maður hefur á hendi. Hér frammi hanga
uppi tíu skilti sem eru safn ráðlegginga sem kallast Geðorðin tíu. Þeim safnaði
Dóra Guðrún Guðmundsdóttir, sálfræðingur, og byggði á rannsóknum um andlega
heilsu og geðrækt. Ég veit þið kunnið þetta út og inn krakkar mínir en ég ætla að
benda á þau þrjú sem mér þykir vænst um. Eitt segir – hlúið að því sem ykkur
þykir vænt um. Annað segir ekki flækja líf ykkar að óþörfu. Og síðast en ekki
síst. Setjið ykkur markmið og látið drauma ykkar rætast.
Og það er máski vegarnesti mitt til ykkar.
Nú er valið ykkar. Veljið með hliðsjón af væntingum ykkar, þess
sem hjartað segir ykkur og munið að við verðum aldrei fullnuma og þess vegna
leitum við áfram að því sem bætir líf okkar, en ekki síður líf annarra. Það er
gaman að breyta heiminum, krefjandi en gaman. Og það er langhlaup.
Farnist ykkur vel, kíkið við og leyfið okkur, sem eftir sitjum, að
heyra af ykkur.
Framtíðina eigið þið. Vegurinn sem þið farið er ykkar vegur. Hann
getið þið gengið með öðrum en aðrir ganga hann ekki fyrir ykkur.
Ég segi skólaárinu 2015-2016 lokið.
Engin ummæli:
Skrifa ummæli