Rétt eina ferðina birtist grein um tölvur og skólastarf. Hún
birtist í Scientific
American, virtu visindatímariti og er frekar dæmigerð fyrir það
festuhugarfar sem skólastarf situr í að mörgu leyti.
Í greininni er réttilega bent á að fartölvur og netaðgangur
geti afvegaleitt athygli nemenda og valdið því að þeir nái ekki háum einkunnum.
Þetta á að vísu mest við nemendur sem leiðist, að sögn höfunda, sem játa að
slíkir nemendur séu raunar líklegir til að fá lægri einkunnir en þeir gætu náð
ef þeir einbeittu sér. En þeir benda á að góðir nemendur sem falla í sömu
gildru lækki einnig í einkunn.
Þannig heldur greinin áfram og kemur pínulítið upp um
festuna í tilvitnun þar sem segir „related research shows that taking
notes by hand is more effective than doing so with a laptop.“
Vandinn við greinina er sá sami og var við umfjöllun í
Bretlandi sem gekk heilmikið á Facebook á síðasta skólaári. Þar var fullyrt að einkunnir
batni þegar snjallsímar séu bannaðir (ein slík hér úr
Time). Einkunnir fóru upp um 6%. En því ekki meira? Hversu hátt hefðu þær
farið ef nemandinn hefði átt að nota snjallsímann við verkefni eða próf?
Og hér er komið að aldagömlum vanda skólastarfs.
Í árdaga háskóla voru engar bækur til. Nema handskrifaðar. Þá
urðu nemendur að hlýða á endursögn kennara og setja í minnispunkta (ef þeir
áttu pappir og penna) eða festa þá í höfði sér.
Prentarar björguðu miklu með list sinni og með þeirra
fagmennsku var hægt að fá mun meira af efni í bókum, m.a. fyrirlestra
meistaranna eða hugleiðingar þeirra.
Þegar krítartöflur voru bornar inn í skóla á líklega 18. öld
fyrst þá var eitt vandamálið það að í fámennum skólum voru allir árgangar saman,
hver að fást við sitt eftir aldri. Ef menn voru í stærri skólum þar sem
nemendum var raðað í bekki eftir aldri og/eða getu og allir voru samstíga þá
var krítartaflann draumur í dós. Þegar útvarp hóf útsendingar sínar þá töldu
menn það myndi leysa af skóla. Sama þegar menn fóru að gera heimildakvikmyndir
og þegar sjónvarpið kom var málið ratljóst. En það gekk ekki eftir og útvarpið,
kvikmyndir og sjónvarp urðu mun öflugri frétta- og afþreyingarmiðlar en
kennslumiðlar.
Það sama gildir orðið um tölvurnar
(fartölvur/spjöld/bretti/snjallsíma). Skólar á Íslandi, almennt séð (veit að
það eru dæmi um annað og að þeim fjölgar), hafa, eins og víðar, ekki náð tökum
á því að gera nemendum grein fyrir því að ofurtölvan sem þeir eru með í vasanum
er lykill að kjarna alheimsins. Bara ef þeir ná að líta upp úr Facebook og
Youtube o.s.frv.
Það eru nokkur mál sem þarf að skoða.
1, Af hverju leiðist nemendum í skóla?
2. Af hverju læra þau betur af glósum, handskrifuðum en að
nota dótið (fartölvur/ spjöld/ bretti/ snjallsíma)?
Hvernig má það vera að sex ára börnin sem streyma inn í
skólana á hverju haust, full af væntingum, útskrifist úr tíunda bekk með vott
af námsleiða sem sest í höfuð sumra þeirra eins og myllusteinn þegar komið er
upp í framhaldsskóla?
Skólinn er ekki ómögulegur, segir Ingvi Hrannar Ómarsson. Hann
gerir nákvæmlega það sem honum er ætlað. Vandinn er bara sá, segir Ingvi
Hrannar, að hann er úreltur.
Byrjum hér. Stærsti hluti íslenskra framhaldsskóla er með
fjölbreyttan hóp. Námshópar eru mjög blandaðir. Þar af leiðandi er fyrirlestur
sem hannaður í kringum getumiðjuna í raun óskiljanlegt tæki.
Verklagið hlýtur að þurfa að breytast. Nálgunin líka.
Hugsaðu þér hversu frábærlega mætti nota tölvutækni mun
meira og á fjölbreyttari hátt í getuskiptum hópi, meira en einstefnukennslu
alla vega (og ég veit að það eru valkostir milli þessara tveggja öfga).
Við eigum ekki að taka (suma) kennaraforfeður okkur of mikið
til fyrirmyndar. Rannsóknin í Scientific American segir mér ekkert annað en að
lykilspurning hafi gleymst.
Það er: Hvernig breytum við verklagi okkar og nýtum þessa
tækni?
Eða viljum við gera eins og Xerxes fyrsti Persakeisari sem
reyndi að leggja hafið í járn því það var svo mikill öldugangur? Þetta var
Sæviðarsund sem hann vildi hlekkja (Bosporussund í Istanbul).
Einu sinni, sem oftar, var okkur Melskælingum smalað á sal
til að horfa á bíó. Miklar væntingar. Vorum á bilinu 10-12 ára.
Spólan fyrsta fór af stað og fjallaði um fólk sem bjó við
svo harðbýl skilyrði að það var allt flutt í burtu úr viðkomandi sveit.
Hræðileg tónlist leikin undir á fiðlu.
Svo var mynd um eldsmíði.
Við horfðum misagndofa á þetta. Ég var áhugamaður um dýr,
sveitasælu, tónlist og ónothæfar upplýsingar og fannst þetta fróðlegt. Ég rakti
þetta fyrir mömmu þegar ég kom heim.
Ég sá þessar myndir a.m.k. þrívegis í Melaskólanum og alla vega
einu sinni í Hagaskóla.
Ég hef oft velt því fyrir mér hver tilgangurinn var því ég
minnist þess ekki að þetta hafi verið rætt. Sem sé nýrri hugmynd troðið inn í
gamalt form. Og hver var tilgangurinn nema að halda okkur uppteknum í smátíma?
Eða ættum við að horfa fram á veginn, með gróskuhugarfar að
vopni og kenna þessum börnum að dótið (fartölvur/spjöld/bretti/snjallsíma) eru
svo miklu meira en heilasefjandi, félagseyðandi, afþreying og glymskrattar (jukebox)?
Engin ummæli:
Skrifa ummæli