Lífræn ferð?

Í dag er hátíð í The Organic Centre og þar er m.a. stjörnukokkur á ferð sem okkur langar að hitta. Við erum með leiðbeiningar frá Silie, - sem okkur grunar reyndar að sé ekki alltaf á sama plani og við hin. Hún virkar svolítið abstrakt á köflum og við förum eftir leiðsögn  hennar, - fyrst um sinn. Eftir fleiri sveitavegi var ákveðið að fletta upp í kortum og spyrja Garminn. Eftir nokkur ævintýraþorp og þrönga vegi komumst við á áfangastað og var sagt að leggja á túni þar sem grasið náði mér upp að hnjám (upp að eyra á Evu!). Ég þakkaði bara fyrir að Fíestan hafði þetta. Svo runnu bílar þarna og spóluðu á kúadellum, - kannski hefði mátt láta þær bíta túnræfilinn áður?
Þessi hátíð var flott, Sigga, Þorri og Emma hittu kokkinn, Neven Macguire, sem færði þeim ungahjónum áritaða bók. Svo var flakkað um og við Eva skoðuðum leiktækin en mesta ævintýrið var ungagarður og hún hélt á kanínu, klappaði geit og fékk andlitsmálningu. Amma Sigga lagði til smáblóm á kinnina en Eva vildi fá tígrisdýr og sat með eindæmum stillt og alvarleg á svip á meðan á þessu stóð. Hún tilkynnti hvaða liti hún vildi og valdi m.a. milli tveggja blárra lita. Og afraksturinn varð líka fínn!
Þegar lagt var af stað heim á leið átti að staldra við og borða. Það gekk ekki andskotalaust fyrir sig. Fyrst vorum við dregin um enn meiri sveitavegi en áður en ég tók völdin af Garminum og fann góðan veg. Í Manorhamilton var aflað nauðsynja en milli 3 og 4 á sunnudegi var lítið af veitingahúsum með mat. Svo við fórum niður á N16 – þar hlytu að vera veitingahús. Eftir 15-20 km akstur og ekki veitingahús í sjónmáli var farið að þyngjast í Siggu svo ekki sé nú talað um Garminn sem var sífellt að endurreikna leiðina. Í Glenfarn fundum við hús og snæddum þennan líka ágæta málsverð. Allir orðnir sársvangir og minntu móttökurnar mig á tiltekið veitingahús í Hexham þegar við  leituðum þangað hungurmorða fjölskyldan í júlí 2003. Þeir vita hvað ég á við sem þekkja þá sögu.

Þegar heim var komið var slakað á í sól og hita sem hefur reyndað ráðið ríkjum að undanförnu, - alla vega Magga til mikillar gleði!